मेरी फटी पुरानी डायरी के शेष पन्नों से मेरी प्रकाशित छत्तीसगढी कवितायें

दाई मोला सुरता आथे - संजीव तिवारी

खदर के छांधी
अउ झिपरा के ओधा म
तिंवरा के दार संग गुरमटिया चाउंर के भात
जेमा सुकसी चिंगरी के साग
अउ उहू म नून मिरचा कम डारे हस कहि के
तोर संग लडई
दाई मोला सुरता आथे

इंहां रहत हंव रोजी बर
कभू बापो पुरखा नई देखे रेहेंव
तइसनेहे बिल्डिगं के तिपत कुरिया म
गिलगोटहा भात के बोरे तहां बासी
अउ उहू म सुख्खा मिरचा के भुरका संग
तिबासी खात
रात कन भभकत कुरिया म
पसीना संग आंसू ह मिल के
तिबासी म जब टप ले टपकथे
दाई मोला सुरता आथे

आघू बाघू रेंगत मोर उदंत भंईसा
पाडू म पटकू भर पहिरे
भंईसा कस तने देंह के मोर ददा
जेखर खांध म नांगर
अउ ओखर पाछू म मोर पढई बर गहना धरे
लहलहावत हमर खेत के पीक
दाई मोला सुरता आथे

मोर घर के ओदरत भिथिया
ददा के माखुर बर पईसा मंगई
गौंटिया घर के देहे
तोर चिरहा अंडी के लुगरा
अउ उहु म तोर सूंता पहुची पहिरे के सौंउख
दाई मोला सुरता आथे

होत बिहिनिया रांध खा के
सेठ के दुकान म बहिरी मारथौं
त सेठ के गोड के धुर्रा संग
मोर जम्मों पढई ह उडा जथे
सं कर बे ! ओ कर बे !
इंहां जा बे ! उहां जा बे !
अउ उहू म सेठ अपन चाय पिये
जूठा कप ल जब धोवाथे
दाई मोला सुरता आथे
अउ सुते के टेम कथरी ह आंसू म फिल जाथे
कि येखरे खातिर मोला करजा लेके पढाये रेहेव

(१९९० किसी स्थानीय पत्र के अभरते स्वर नामक स्तंभ में प्रकाशित)


चिनहा - संजीव तिवारी

कईसे करलाई जथे मोर अंतस हा
बारूद के समरथ ले उडाय
चारो मुडा छरियाय
बोकरा के टूसा कस दिखत
मईनखे के लाश ला देख के
माछी भिनकत लाश के कूटा मन
चारो मुडा सकलाय
मईनखे के दुरगति ला देखत
मनखे मन ला कहिथे
झिन आव झिन आव
आज नही त काल तुहूं ला
मईनखे बर मईनखे के दुश्मनी के खतिर
बनाये बारूद के समरथ ले उडाई जाना हे

हाथ मलत अउ सिर धुनत
माछी कस भनकत
पुलिस घलो कहिथे
झिन आव झिन आव
अपराधी के पनही के चिनहा मेटर जाही

फेर में हा खडे खडे सोंचथौं
जउन हा अनियाव के फौजी
पनही तरी पिसाई गे हे
तेखर चिनहा ला कोन मेटार देथे ?
मईनखे बर मईनखे के स्वारथ खातिर

(१९९३ के बंबई बम कांड के दूसरे दिन दैनिक भास्कर के मुख्य पृष्ट पर प्रकाशित)


सुरहुत्ती - संजीव तिवारी

कहां ले बरही मनटोरा
तोर तेल बिन दिया ह
सुरहुत्ती के दिया ह दाउ मन बर ये
मोर करम म त सिरिफ
मोर मेहनत के चूहे तेल
अउ महाजन के कर्जा देहे दाना के बाती हे
जउन हा पेट के करिया रात ला
बुग बुग बर के अजोरत हे
अउ उही अंजोर म
मोर लछमी बूढी दाई
चूरी पहूंचा पहिरे
दुवारी दुवारी
कांसा के पुरखौती थारी मा
दीया सजाये
कभू ढाबा त कभू कोठी
त कभू कोठार म
दीया बांटत दिखत हे

(दीपावली विशेषांक विवरण उपलब्ध नही में प्रकाशित)